தேர்தல், பெரியார் திக, தேர்தல் புறக்கணிப்பு

மக்களுக்கு தேவைப்படும் கருத்துக்களை எந்த சமரசமும் இல்லாமல் மக்களிடம் கொண்டு சேர்க்க முடியும் என்பதை தந்தை பெரியார் சாதித்து காட்டினார். பெரியாருக்கு பிறகு திராவிடர் கழம் ஆசிரியர் திரு.வீரமணி அவர்களின் சுயநலத்தால் ஆளுங்கட்சி ஆதரவை மட்டுமே குறிக்கோளாக கொண்டு பணியாற்ற தொடங்கியதும் தந்தை பெரியாரின் கொள்கைகளை முன்னெடுப்பதில் பெரியார் திராவிடர் கழகம் குறிப்பிடத்தகுந்த பணியாற்றியுள்ளது. மக்கள் மத்தியில் பெரியார் திராவிடர் கழகம் அமைப்பு ஏற்படுத்திய மிகப் பெரிய விழிப்புணர்வாக தற்போதைய ஈழப் போராட்டத்தினை குறிப்பிட முடியும்.

ஈழப் பிரச்சனையில் மக்கள் படும் இன்னல்களையும் அவலத்தினையும் தமிழக மக்களிடம் கொண்டு சேர்த்ததிலும், திமுக-காங்கிரஸ் கூட்டணிக்கு எதிராக மக்களை திரட்டியதிலும் பெரியார் திராவிடர் கழகத்தின் பங்களிப்பு குறிப்பிடத்தக்க அளவில் இருந்தது. ஜெயலலிதாவை தமிழர்களுக்கு ஆதரவானவராக அடையாளம் காட்ட நேர்ந்தது தான் இந்தச் சூழ்நிலையில் அவலமான ஒன்று. திராவிடர் கழக தலைவர் ஆசிரியர் வீரமணி அவர்கள் தன்னை ஆளுங்கட்சி ஆதரவாளராகவே தொடர்ந்து ஒவ்வொரு காலக்கட்டத்திலும் வெளிப்படுத்தி வந்திருக்கிறார். இதற்கு அவர் பராமரித்து வரும் கல்விக்கூடங்கள், பெரியார் சொத்து போன்றவை முக்கியமான காரணங்கள். இவ்வாறு திராவிடர் கழகத்தின் பங்களிப்பு என்பது கல்விக் கூடங்களின் பராமரிப்பு என்றளவுக்கு சுருங்கிய பிறகு திராவிடர் கழகத்தின் தேவை தற்போதைய காலக்கட்டத்தில் முக்கியமாக உள்ள சூழ்நிலையில் பெரியார் திராவிடர் கழகம் தமிழகத்தில் மிகச் சரியான நேரத்தில் குறிப்பிடத்தகுந்த பங்களிப்பை செய்திருக்கிறது. இதற்காக களத்தில் இருந்து பாடுபடுகிற அனைத்து தோழர்களுக்கும் என்னுடைய நன்றி.

இந்த தேர்தலில் ஈழப் பிரச்சனை ஒரு முக்கியமான பிரச்சனையாக இருக்காது, ஈழம் சார்ந்து மக்கள் வாக்களிக்க மாட்டார்கள், ஈழப் பிரச்சனை இந்த தேர்தலில் முக்கிய பிரச்சனை இல்லை, இல்லை, இல்லவே இல்லை என்றே எல்லோரும் கூறிக் கொண்டே இருந்தனர். எல்லா தொலைக்காட்சி ஊடகங்களும் இது முக்கிய பிரச்சனை இல்லை, இல்லை என்றே கூறிக் கொண்டிருந்தன. குறிப்பாக வட இந்திய ஆங்கில தொலைக்காட்சி சேனல்களில் தோன்றும் சோவும், என்.ராமும், சுப்பிரமணியம் சுவாமியும் இது ஒரு முக்கியப் பிரச்சனை இல்லை என்று கூறிக் கொண்டே இருந்தனர். இதைத் தவிர வேறு பிரச்சனைகளைப் பற்றி இந்த தேர்தல் காலத்தில் யாருமே பேசவில்லை. இப்படி பேசிப் பேசியே இன்றைக்கு யாரும் அறியாமலேயே, அரசியல்வாதிகள் விரும்பாமலேயே ஈழப் பிரச்சனை இந்த தேர்தலில் முதல் முக்கியமான பிரச்சனையாகி விட்டது. ஜெயலலிதாவும், கருணாநிதியும் மாற்றி மாற்றி நாடகம் ஆடிக் கொண்டிருக்கிறார்கள்.

இந்த தேர்தலில் ஈழப் பிரச்சனை ஒரு முக்கியமான பிரச்சனையாக உருவெடுக்க இருந்த பல காரணங்களில் (மக்களின் பேரவலம், நவீன ஹிட்டலாரக உருவெடுத்துள்ள ராஜபக்சே போன்றவை) இன்றைய தகவல் தொழில்நுட்பமும் ஒரு காரணம். 1990களின் பிற்பகுதியில் யாழ்ப்பாணத்தை நோக்கி சிங்கள இராணுவம் முன்னேறிய பொழுது இந்தளவுக்கு அந்த நிகழ்வு தமிழகத்தில் தாக்கத்தை ஏற்படுத்தவில்லை. போர் அங்கே நடக்கிறது என்பது தெரியுமே தவிர அங்கு மக்கள் பட்ட இன்னல்கள் தெரியவில்லை. கிளிநொச்சி, யாழ்ப்பாணம் போன்ற பகுதிகளை அப்பொழுதும் புலிகள் இழக்கவே செய்தனர். மக்கள் சிங்கள இராணுவத்தின் கொடூரமான தாக்குதல்களுக்கு இலக்காகினர். தற்போதைய தாக்குதல் போன்று இல்லை. என்றாலும் அப்பொழுதும் மக்கள் அவலங்களை எதிர்கொண்டே இருந்தனர். அக் கால கட்டத்தில் பி.பி.சி தமிழோசை மூலமாகவே ஈழத்தில் நடந்து கொண்டிருக்கும் ”உண்மையான” செய்திகளை அறிய முடியும். ஆனந்தி அக்கா அப்பொழுது தமிழோசையில் இருந்தார். பி.பி.சி தமிழோசையை கடினப்பட்டே கேட்க வேண்டிய சூழ்நிலை இருந்தது. சில நேரங்களில் சரியாக கேட்காது. இந்திய/தமிழக ஊடகங்களும் அது பற்றி பேசியதில்லை. ராஜீவ் கொலைக்கு பிறகு திட்டமிட்டு அவர்கள் ஈழப்பிரச்சனையை மறைத்து கொண்டிருந்தனர்.

ஆனால் இன்றைய இணைய யுகத்தில், தொலைக்காட்சியின் வளர்ச்சியில் செய்திகள் மக்களை சென்றடைந்திருக்கிறது. நம் கையில் ஒரு உருப்புடியான ஊடகமும் இல்லாத நிலையிலும் ஈழப் பிரச்சனையை மக்களிடம் ஊடகங்களின் பெரிய உதவிகள் இல்லாமலேயே சென்று சேர்க்க முடிந்திருக்கிறது.

இந்த தேர்தலில் மற்ற எந்த மாநிலங்களிலும் இல்லாத வகையில் பெரியார் திராவிடர் கழகம் வெளியிட்ட சிடிக்கள் தமிழகத்தில் தாக்கத்தை ஏற்படுத்தி வருகிறது. பெரியார் திராவிடர் கழகம் தமிழகம் முழுவதும் வெளியிட்ட ஆயிரக்கணக்கான சிடிக்கள் குறிப்பிடத்தக்க பாதிப்புகளை ஏற்படுத்தியிருப்பதாக கூறுகிறார்கள். இப்படி வீடு வீடாக சிடி விநியோகிப்பது என்பது ஒரு புதிய வியூகம். இது வரை தமிழக தேர்தல் வரலாற்றில் யாரும் இது போன்று செய்ததில்லை. இன்றைய நவீன தொழில்நுட்ப காலத்தில் சிடி ப்ளோயர் இல்லாத வீடுகளே குறைவு என்றாகி விட்ட சூழ்நிலையில் இது குறிப்பிடத்தக்க மாறுதலை மக்களிடம் ஏற்படுத்தியிருக்கிறது. பெரிய கட்சிகளிடமும், பார்ப்பன, பனீயா வர்க்கத்தின் வசமும் உள்ள தொலைக்காட்சி ஊடகங்களை நம்பாமல் நம்மை நாமே மக்களிடம் அறிமுகப்படுத்திக் கொள்ள ஒரு புதிய வழியை பெரியார் திராவிடர் கழகம் தமிழகத்தில் அறிமுகப்படுத்தியிருக்கிறது. இந்த தேர்தலில் காங்கிரஸ் தோல்வி அடைந்தால் அதில் பெரியார் திராவிடர் கழகத்தின் பங்கு முக்கியமானதாக இருக்கும்.

பெரியார் திராவிடர் கழகம் தொடங்கிய இந்த திட்டத்தை பல அமைப்புகள் தொடர்ந்து செய்து வருகின்றன. காங்கிரசை எதிர்த்து செயல்பட்டு வரும் இளந்தமிழர் இயக்கம், மாணவர் அமைப்புகள், வழக்கறிஞர் அமைப்புகள், பெண்கள் அமைப்புகள் போன்ற எண்ணற்ற தமிழ் அமைப்புகள் இதனை செய்து வருகின்றன. இந்த அமைப்புகள் கூட தங்களுடைய பரப்புரை இந்தளவுக்கு தாக்கத்தை ஏற்படுத்தும் என உணர்ந்திருக்க மாட்டார்கள். எந்த பிரதிபலனையும் எதிர்பாராமல் தமிழர்கள் மீது கொண்ட அக்கறை, ஈழத்தமிழ் மக்கள் மீது தொடுக்கப்படும் இனப்படுகொலை போன்றவை சார்ந்து தங்கள் சொந்தப்பணத்தை போட்டு இந்த அமைப்புகள் வேலை செய்து கொண்டிருக்கின்றன. தமிழ் உணர்வும், காங்கிரஸ் மீதான கோபமும் மட்டுமே இவர்களை இந்த பரப்புரையில் ஈடுபடுத்தியது. இவர்களின் உழைப்பிற்கு ஏற்ற பலன் கிடைக்க தொடங்கியிருப்பதையே சமீப நாட்களில் தமிழகத்தில் காணப்படும் சூழ்நிலை தெளிவுபடுத்துகிறது.

இந்த தாக்கத்தை முக்கிய அரசியல் கட்சிகள் ஆரம்பத்தில் எதிர்பார்க்கவில்லை. இதனை எல்லா அரசியல் கட்சிகளும் அலட்சியப்படுத்தி கொண்டே தான் இருந்தன. ஈழப் பிரச்சனையை சார்ந்து கூட்டணி அமைக்க நாம் வலியுறுத்திய பாமக, மதிமுக, விசி போன்றைவை கூட ஈழப் பிரச்சனை இந்தளவுக்கு தமிழகத்தில் தாக்கத்தை ஏற்படுத்தும் என உணரவில்லை. ஆனால் தேர்தல் நாட்கள் நெருங்க, நெருங்க ஈழத்தில் இருக்கும் சூழ்நிலையில் ஏற்படும் மாற்றமும், தமிழ் அமைப்புகளின் பரப்புரையின் தாக்கமும் தற்பொழுது உணரப்படுகிறது. உள்துறை அமைச்சர் ப.சிதம்பரம் போன்றோர் தங்களது பணபலத்தை கொண்டு வெற்றி பெற்று விடலாம் என்ற நம்பிக் கொண்டிருக்கின்றனர். தமிழ் அமைப்புகளின் பரப்புரை ப.சிதம்பரம் மற்றும் காங்கிரஸ் புள்ளிகளின் பணபலத்தின் முன்பு மட்டுமே தோற்க முடியும். அவர்களின் பணபலம் இல்லாவிட்டால் தமிழ் அமைப்புகளின் பரப்புரை வெற்றி பெறும் என்பதே தற்போதைய களநிலவரம் என தெரிகிறது

இத்தகைய சூழ்நிலையில் காங்கிரஸ் அது போட்டியிடும் அனைத்து இடங்களிலும் தோல்வியுற்றால் பணநாயகத்தை மக்களின் உணர்வு அலை வென்றதாக கொள்ள முடியும். மாற்று அரசியலை முன்வைக்கும் நம்மைப் போன்றவர்களின் நிலைப்பாட்டினையும் அது பலப்படுத்தும். இந்த தேர்தலில் முன் எப்பொழுதும் இல்லாத அளவுக்கு கரன்ஸி மழை பொழிந்து கொண்டிருக்கிறது. முன் எப்பொழுதையும் விட தற்பொழுது ஜனநாயகம் என்பது பணநாயகம் என்றாகி விட்டது. முன்பு ஒரு கோடி, இரண்டு கோடி என தொகுதிக்கு செலவு செய்து கொண்டிருந்த அரசியல் கட்சிகள் இன்றைக்கு நவீன பொருளாதார வளர்ச்சியில் பல கோடிகளை தொகுதிக்குள் செலவழித்து கொண்டிருக்கின்றன. தமிழக தேர்தலுக்கு மட்டும் சில ஆயிரம் கோடிகளை அரசியல் கட்சிகள் செலவு செய்து கொண்டிருப்பதாக தெரிகிறது. இப்படி ஆயிரக்கணக்கான கோடிகளை அரசியல் கட்சிகளும், அதன் பிண்ணையில் இருக்கின்ற பன்னாட்டு நிறுவனங்களும், தொழில் அதிபர்களும் செலவு செய்து கொண்டிருக்கையில் இந்திய/தமிழக அரசியலில் ”மாற்றம்” என்பதே அர்த்தமற்ற ஒன்றாகவே இருக்கிறது.

எனவே இத்தகைய அரசியலை புறக்கணிக்க வேண்டும் என மகஇக போன்ற அமைப்புகள் செல்வதில் இருக்கும் நியாயத்தை நாம் மறுக்க முடியாது. மக்கள் மீது அக்கறை கொண்ட இயக்கமாகவே இத்தகையே இயக்கங்கள் உள்ளன. அதன் கொள்கைகளில் எனக்கு பிடிப்பு உண்டு. அதே நேரத்தில் இன்றைக்கு மக்கள் தேர்தலை ஒரு சுவாரசியமான கொண்டாடமாகவே நினைக்கின்றனர். பெரிய அளவிலான பொருளாதார நெருக்கடி மக்களுக்கு இல்லை. இருக்கின்ற வாழ்வை அப்படியே வாழ்ந்தாலே போதும் என மக்கள் நினைக்கின்றனர். அவர்களின் சூழலை புரிந்து கொள்ளாமல் போராடு, புரட்சி செய் என்ற இடதுசாரி அமைப்புகளின் முழக்கம் மக்களிடம் அந்நியப்பட்டு நிற்கிறது. இந்த இயக்கங்கள் இருக்கின்ற வாழ்க்கையை கெடுத்து விடுவார்களோ என்ற பதட்டம் மக்களுக்கு ஏற்படுகிறது. இடதுசாரி அமைப்புகளின் முழக்கம் நேபாளத்தில் பொருந்தலாம். அங்கே அப்படியான சூழ்நிலை இருந்தது. இன்றைய தமிழகத்தில் அது எடுபடுமா ?

இத்தகைய சூழலில் இன்றைக்கு தேவை மாற்று அரசியலா, தேர்தல் புறக்கணிப்பா ?

கேள்விகளை முன்வைத்து விட்டு, அடுத்து வரும் நாட்களில் விவாதிப்போம்...